Трыпціх пра каханне і восень
|
1 Прыгожы, высокі, значны свет дзіўны майго бясоння з халодных восеньскіх ночаў, з часоў самай злой адзіноты марнее, сыходзіць, знікае, як мара мая пра каханне. І вобраз такі банальны паслужліва памяць стварае: як згустак гарачай крыві, што цела жывое кідае, становіцца чорнаю плямай, імкнецца ў палон да формы, знямелай, застылай, страшнай у правільнасці квадратнай. І траціцца сэнс былога, а новае - тая ж цемра, што б'ецца аб чорныя сцены. І нават рукі твае, і нават вусны твае не могуць вырваць з адвечнага злога палону, і я раствараюся ў ім. 2 Ніколі не будзе вяртання ў шалёнае пекла цемры, і ў цьмяныя вокны ночы ніколі не глянеш ты праз вочы мае на шыбах, замглёных цяплом дыхання. Я ўдзячна табе, каханы, за тое, што ты не прыйдзеш. У восеньскім шэрым змроку не згіне маё пачуццё, бо веру: не мог ты здрадзіць свайму невядомаму сонцу, далёкай і роднай планеце, дзе некалі з'явішся ты. Шкада, што не будзе вяртання... 3 Няхай мне засталіся толькі вершы. Няхай мяне страчае толькі восень. Ты быў. Мне дастаткова ў тое верыць... Ты быў? А можа, гэта мне здалося? Напэўна, гэта толькі водгук слова, што я сама прыдумала. Пра шчасце. Хацела ведаць, што ж гэта такое? Уведала. Спазнала. Не ўтрымала. Тваё каханне ты забраў з сабою. Маё каханне восень не забрала.
|
|